الإدمان مش بس إدمان مخدرات..

الإدمان بشكل عام هو التعلق والارتباط بشيئ بشكل يصعب الاستغناء عنه، عشان كدة كتير مننا وهو بيتفرج كان بيربط أحداث المسلسل بحاجات في حياته حتى وأحنا مش مدمنين مخدرات ولا حاجة..
وإلى جانب المفردات المضافة لقاموسنا من المسلسل زي “نقضي، نضرب، بيسة، يكمر، متعافي..” إلخ
حبينا نضيف شوية معلومات عن أنواع الإدمان الأخرى، غير إدمان المخدرات..

5+ أنواع إدمان ماتكلمش عنهم #تحت_السيطرة :

أولاً : الإدمان إما ناتج عن سبب نفسي، أو من تصرفات مكتسبة، وبينقسم لنوعين أساسيين وكل نوع تحته أنواع فرعية :-

النوع الأول:
“إدمان للمادة” :
وده اللي بيحتوي على إدمان المخدرات، السجائر، الكحوليات، وحتى إدمان الأدوية والعقاقير..

النوع التاني :
“إدمان التصرفات” :
وده بيحتوي على أنواع الإدمان اللي عندنا إحنا بقى “مش كلها يعني بس بعضها”

1-إدمان المقامرة:
دايما في الأفلام بيجيبوا إن اللي بيلعب قمار صعب يبطله حتى لو كان بيخسر، ه لأن المقامرة أو الرهانات فعلا إدمان، والأبحاث أثبتت إنه هو النوع الأقرب لإدمان المخدرات من حيث التاثير على المخ وطرق العلاج.

2-إدمان العلاقات الحميمية :
يسمى بمرض “الشره الجنسي” وبما أن الإفراط في أي شيء يضر، فهذا النوع أيضا يعتبر إدمان يجب علاجه بنفس طرق علاج الإدمان.

3-إدمان الإنترنت:
وطبعا كلنا الحمدلله بنضرب وبنكمر وبنقضي ساعااااات على الانترنت، لدرجة إن لو الانترنت قطع بنحس إننا بقينا في عزلة عن العالم! وإدمان الانترنت فعلا ممكن يضر بقدرة الشخص الانتاجية في الشغل وحتى علاقاته الاجتماعية والتواصل مع الناس برة العالم الافتراضي.

4 – إدمان التسوق:
في بنات وستات كتير “ويمكن رجالة كمان” نفسيتهم بتتحسن جدا بعد شراء شيء جديد، ده ممكن يخلي الموضوع حتمي، إن كل ما نفسيتي تضايق أنزل أقضي\ اشتري هدوم أو أجهزة او اكسسوارات…إلخ جديدة عشان اتبسط
الأبحاث أثبتت إن الستات والبنات هن الاكثر تأثرا بالنوع ده من الإدمان، والنوع ده مضر على المستوى المادي والاقتصادي والاجتماعي.

5-إدمان الألعاب:
وده بقى بيصيب الرجالة أكتر من الستات والبنات، الراجل اللي بتتحول كل متعته في الحياة لإنه يلعب “بلاي ستيشن” في البيت مع أصحابه أو حتى لوحده.
النوع ده بيأثر جدا على العلاقات الاجتماعية بين الاشخاص، بالإضافة للأضرار اللي هيسببها طول فترة الجلوس أمام الألعاب.

6-إدمان التجميل:
أكيد فاكرين حاتم وعروسة الجديدة اللي كانت عايزة تعمل عملية تجميلpermanent makeup
فعلا عمليات التجميل إدمان بردو، نسبة المصابين بهذا النوع من الإدمان قليلة جدا في العالم، والنوع ده بيكون ناتج عن إنعدام الثقة في النفس والشكل الخارجي للشخص.

7-إدمان الطعام:
في المجال ده في مصطلح اسمه “emotional eaters” و دول الناس اللي بتاكل بشكل مضطرب ناتج عن إضطراب عاطفي ما..
ومن الأعراض المتعارف عليها في نوع الإدمان ده هو الاندفاع ناحية الاكل عند الشعور بالضيق أو الخوف والاحساس بالذنب بعد الأكل.. وطبعا كلنا عارفين النوع ده مضر في ايه.. وايه.. وايه… 😀

8-إدمان المخاطر:
البحث عن المغامرة الشغف مهم، لكن أحيانا بيتحول لإدمان، لأن الأبحاث اثبتت إن السعادة اللي بيحس بيها الشخص بعد المغامرة بتساوي نفس قدر السعادة بعد تعاطي المخدرات وده بيخلي الشخص عايز يكرر التجربة مرات كتيرة.

9-إدمان التعذيب أو الألم:
وده نوع مرضي شوية من الإدمان قد يكون ناتج عن سبب نفسي إن الشخص يكون بيستمتع بتعذيب نفسه أو غيره سواء نفسيا أو بدنيا.

10-إدمان الشغل:
أحيانا الشخص بيهرب من حياته بالشغل، واحيانا النجاح في الشغل والسعادة اللي بيسببها تتحول لإدمان عند الشخص.